Band Zonder Naam neem finaal afskeid van Suid-Afrika na 40 jaar in die musiekindustrie.
Jan Keizer en Anny Schilder het tydens die 70’s en 80’s Afrikaanse harte verower met van hul grootste treffers soos Yeppa, Tonight, Wheels on Fire, Le Legionnaire, Waltzing Maria en Mon Amour.
Die liedjies is steeds groot gunstelinge waarvan die klanke nog gereeld op plaaslike radiostasies gehoor word. Die legendariese duo sluit dié jaar hul loopbane af met drie finale optredes in Suid-Afrika. “Suid-Afrika was nog altyd goed vir ons. Ons is lief vir die land en die mense,” vertel Anny.
Hul beplan ʼn onvergeetlike reis deur die jare, propvol herinneringe en heimwee. Met meer as 30 albums op hulle kerfstok, beloof die grand finale om nie één treffer te oor te sien wat BZN beroemd gemaak het nie.
Deur die jare het hulle verskeie toekennings ontvang vir die wonderlike musiek waarmee hul luisteraars bederf het. Die tweemanskap is albei deel van die oorspronlike groep en is die enigste groep wat vir meer as 26 agtereenvolgende jare (1973 to 1998) enkelsnittreffers op die Top 40 gehad het.
Om die heel laaste optredes van BZN in Suid-Afrika nog meer onvergeetlik te maak, snoer hulle kragte saam met verskeie top plaaslike kunstenaars. Name soos Juanita du Plessis, Nadine, Ruan Josh, Franja du Plessis, Manie Jackson, asook Christo en Cobus gaan deel vorm van die voorskou.
Met so wonderlike oploop tot die Grand Finale beloof die konserte om BZN se finale toer op ʼn reusehoogtepunt te eindig. Inderdaad nie ʼn geleentheid om mis te loop nie.
Kaartjies vir die optredes beloop tussen R250-R650 per person en is beskikbaar op iTickets.
11 Oktober – Grand Arena, Grand West in Kaapstad
12 en 13 Oktober – Carnival City in Johannesburg
