Suid-Afrika se nuutste sensasie, Kontras, is terug met ’n splinternuwe enkelsnit, DIE HAPPY SONG. Dit is die tweede vrystelling van hul debuutalbum, Ruimtevaarder, wat vroeg in September vrygestel gaan word.
DIE HAPPY SONG volg na die suksesvolle vrystelling van VELDE, wat uitgereik is met ’n musiekvideo. Die sukses van VELDE wys dat Kontras meer as net nog ’n rockgroep is wat beslis nie geïgnoreer kan word nie. Indien jy ’n aanhanger is van Spoegwolf, Karen Zoid of Francois van Coke, is DIE HAPPY SONG perfek vir jou.
Kontras se mees sensitiewe stuk tot op hede, DIE HAPPY SONG, is ’n huldeblyk aan moeders, vrouens en enigiemand wat deur ’n moeilike tyd gaan. Dit begin met net ’n akoestiese kitaar teen ’n stadige tempo, maar word ryker in tekstuur soos meer stemme, kitare en dromme bygevoeg word.
Dit is ’n hartroerende treffer wat ’n traan in elkeen se oog sal laat opspring. DIE HAPPY SONG is die perfekte Kontras-song om jou deur die winter te dra en is beskikbaar alle digitale platforms: Klik hier.
Kontras – Die Happy Song:
Hier’s hy nou, terug en tuis
Kom van ’n ander vrou se huis
En ek wonder hoe moet dit vir haar voel
Sy wonder seker wat sy gedoen
En hoe hy voel as hy haar soen
En dink hoe sy beter vir hom kon wees
En as ek jou pyn kon dra
Soos Simon op pad na Golgota
Weet net ek sal al my bloed vir jou bloei
En as jy roep is ek altyd daar
Ek’t stompe liefde vir jou opgegaar
Vir ’n vuur om jou warm te kan hou
As die kaaltrekwinter kom
As hy kom, as hy kom
As die kaaltrekwinter weer kom
Sal ek vir jou ’n vuur kan bou
Om die donker
Uit te hou, uit te hou
Jy moet uit kan hou, uit kan hou
Uit te hou, uit te hou
Jy moet uit kan hou, nog vir ’n rukkie
Want as die son weer uitkom
Onthou jy, jy’s ’n sonneblom
Want as die son weer uitkom
Onthou jy, jy’s ’n sonneblom
Jy verdien ’n happy song, maak dié ’n happy song
Jy verdien ’n happy song, maak dié and ’n happy song
Jy verdien ’n happy song, ons maak dié ’n happy song
Jy verdien ’n happy song
Ons maak dié ’n happy, ons maak dié ’n happy song
Ons maak dié ’n happy
Ons maak dié ’n happy song
SOSIALEMEDIASKAKELS:
Facebook, Instagram, Spotify, Apple Music
Lees meer oor Kontras: https://www.plectrummusiek.co.za/kontras-se-verras-met-nuwe-enkelsnit-en-video-velde/
